Ahkam-e-Elahi Decrees Of God Allama Iqbal Poetry Shayari

احکام الہی

پابندی تقدیر کہ پابندی احکام!
یہ مسئلہ مشکل نہیں اے مرد خرد مند

مطلب:اے عقل مند شخص اس بات کا جواب مشکل نہیں ہے کہ تجھے تقدیر کے احکام کی پابندی کرنی چاہیے یا اللہ کے احکام کی۔

اک آن میں سو بار بدل جاتی ہے تقدیر
ہے اس کا مقلد ابھی ناخوش ، ابھی خورسند

مطلب: تقدیر تو مستقل کسی کی بھی نہیں ہوتی۔ایک لمحہ میں سوبار بدل سکتی ہے۔تقدیر کے احکام کی پیروی کرنے والا(اگر تقدیر کا فیصلہ اس کی پیروی کرنے والے کے حق میں نہیں) تو وہ اس سے ناراض ہو جاتا ہے۔اوراگر اس کے خیال کے مطابق ہو تو خوش ہو جاتا ہے۔تقدیر کی پابندی دکھوکہ ہے۔اصل پابندی اللہ کے احکام کی ہے جس کے تقدیر بھی تابع ہے۔

تقدیر کے پابند نباتات و جمادات
مومن فقط احکام الہی کا ہے پابند

مطلب:تقدیر کی پابندی کرتے تو ہم نے جمادات(زمین ،پہاڑ،پتھر،سونا،موتی وغیرہ بے جان اشیا)کو دیکھا ہے یا نباتات کو جو گھاس پھوس فصلوں وغیرہ پر مشتمل ہے۔مومن کوئی جماداتی یا نباتاتی مخلوق نہیں ہے۔وہ حرکت کرنیوالی با عقل وبا اختیار مخلوق ہے۔اور سوائے اللہ کے احکام کے کسی اور کے حکم کو تسلیم نہیں کرتا۔تقدیر کو مومن احکام الہیٰ کے تحت سمجھتا ہے،اس لیے وہ اس کی پابندی نہیں کرتا۔