Masti-e-Kirdar Fervour For Action Allama Iqbal

مستی کردار

صوفی کی طریقت میں فقط مستی احوال

ملا کی شریعت میں فقط مستی گفتار

مطلب :علامہ آج کے دور کے پیشہ ور اور رسمی علمائے دین اور صوفیا کی بات کرتے ہوئے کہتے ہیں کہ تصوف کا باطنی علم محض مستی کیفیات کا اور شریعت (دین کا قانون )صرف باتوں کی مستی کا نام رہ گیا ہے۔عمل کی مستی دونوں میں گم ہو چکی ہے۔

شاعر کی نوا مردہ و افسردہ و بے ذوق

افکار میں سرمست، نہ خوابیدہ نہ بیدار

مطلب: صوفیوں اور علما ء سے ہٹ کر اگر ادیبوں خصوصاً شاعروں کو دیکھیں تو ان کی شاعری مری ہوئی اور بجھی ہوئی ہے۔اس میں کوئی جوش،کوئی ولولہ،کوئی صداقت اور سوئی ہوئی قوم کو جگانے کے لیے کوئی پیغام نہیں ہے بلکہ اس سے الٹ قوم کو مردہ اور افسردہ کرنے کی باتیں موجود ہیں۔آج کے نام نہاد شاعراپنے فرضی خیالات میں مگن ہیں۔ان کی حالت یہ کہ نہ وہ سوئے ہوؤں میں سے معلوم ہوتے ہیں اور نہ جاگے ہوؤں میں سے۔بس اپنے فرضی خیالات میں مست ہیں۔جن میں کوئی عملی بات اور پیغام نہیں ہے۔

وہ مرد مجاہد نظر آتا نہیں مجھ کو

ہو جس کے رگ و پے میں فقط مستی کردار

مطلب : تصوف ہو کہ شریعت،ادب ہو کہ فن ،شعر ہو کہ ہنر مجھے اس دور میں کسی بھی میدان میں باطل کے خلاف جہاد کرنے والا ،کوئی شخص نظر نہیں آتا (ایسا باطل سے ٹکرانے والا مرد جس کی رگ رگ میں صرف کردار (عمل )کی مستی ہو دکھائی نہیں دیتا ۔یعنی سب قول کے پجاری ہیں عمل سے ان کا کوئی واسطہ نہیں۔